Sauðárkróks-Hestar » Fréttir

Kómeta í fyrstu verðlaun

Sauðárkróks-Hestar — Sat, 21 Aug 2010 21:56:43 +0000

Kómeta frá Sauðárkróki var dæmd á Gaddastaðaflötum í lok júlí. Hún fór í fyrstu verðlaun með 8,5 fyrir tölt, vilja og fegurð í reið. Það er gott að þessum áfanga er náð með hana. Það var snillingurinn Sigurður V. Matthíasson sem sýndi Kómetu. Eftir sýninguna hitti hún stóðhestinn Byr frá Mykjunesi sem er stórefnilegur 5 vetra hestur. Meðfylgjandi eru myndir af Kómetu og Byr.

Ný folöld

Sauðárkróks-Hestar — Wed, 21 Jul 2010 23:31:33 +0000

Systurnar Hrund og Hetta köstuðu fyrir nokkrum dögum síðan. Hetta kom með rauðstjörnótta hryssu undan Mola frá Skriðu. Fallegt folald sem gormast um á vígabrokki. Hrund kom með brúnskjótta hryssu undan Þristi frá Feti, litskrúðugt og spengilegt folald. Þá á aðeins ein hryssa eftir að kasta en það er Urður sem er fylfull við Óskasteini frá Íbishóli.

Arabi

Sauðárkróks-Hestar — Fri, 16 Jul 2010 14:30:11 +0000

Arabi er þriggja vetra stóðhestur í okkar eigu undan Eldingu og Glym. Við vorum á ferð í A-Húnavatnssýslu um daginn og heilsuðum uppá Araba sem er þar í hryssum. Hann leit vel út og eins og sjá má á myndunum sem við tókum er hann alltaf jafn háreistur og glæsilegur.

Hvíta-Sunna köstuð

Sauðárkróks-Hestar — Mon, 28 Jun 2010 23:48:40 +0000

Hvíta-Sunna kom okkur á óvart og kastaði fyrr en við áttum von á. Hún kom með brúnstjörnótta hryssu en faðirinn er Krákur frá Blesastöðum. Fínlegt og frítt folald sem fer um á fallegu tölti. Þær mæðgur eru farnar norður í Eyjafjörð þar sem Hvíta-Sunna mun fara undir gæðinginn Kvist frá Skagaströnd.

Sumarhagar

Sauðárkróks-Hestar — Thu, 17 Jun 2010 23:09:20 +0000

Í vikunni klipptum við hófa á öllum tryppunum og gáfum ormalyf. Eftir það voru þau rekin í sumarhaga á Miklahóli. Meðfylgjandi eru myndir af skjóttum unghryssum með sumarhagana í baksýn. Ennig eru myndir af brúnstjörnóttri þriggja vetra undan Slettu og Samber og jarpri tveggja vetra undan Hvíta-Sunnu og Aðli.

Vekringsefnin Bragi og Grettir

Sauðárkróks-Hestar — Sun, 13 Jun 2010 21:37:11 +0000

Við eigum tvo þriggja vetra fola sem eiga að verða miklir vekringar í framtíðinni! Þeir eru báðir undan Kjarval en mæðurnar eru Ólga og Þoka . Það eru mikil skeiðgen í þessum bræðrum og vonandi standa þeir undir væntingum. Allt uppeldi hefur miðast við það að gera þá nógu öfluga og Ólgu sonurinn gengur enn undir móður sinni. Hvort þetta heppnast mun tíminn leiða í ljós en það er gaman að láta sig dreyma.

Önnur hryssa undan Óskasteini

Sauðárkróks-Hestar — Sun, 13 Jun 2010 21:25:30 +0000

Fengum gullfallega rauða hryssu undan Sjöfn og Óskasteini. Hún er háfætt með grannan háls og hreyfingafalleg. Eftir að hafa séð þessar tvær hryssur undan Óskasteini bíðum við spennt eftir að Urður kasti en hún er einnig fylfull við honum.

Glóblesa köstuð

Sauðárkróks-Hestar — Sun, 13 Jun 2010 21:16:30 +0000

Folald númer þrjú er undan Glóblesu og Óskastein frá Íbishóli. Við fengum jarpa hryssu sem fer um á fallegu tölti, fríð og fínleg.

Hvítserksdóttir

Sauðárkróks-Hestar — Fri, 21 May 2010 14:53:18 +0000

Folald númer tvö kom í heiminn í gær. Hetja kastaði Brúnstjörnóttri hryssu undan Hvítserk frá Sauðárkróki. Þetta er fyrsta afkvæmi Hvítserks sem fæðist en hann er þriggja vetra stóðhestur undan Kná og Álfi frá Selfossi.

Með fréttinni eru myndir af mæðgunum og stoltum föður.

Fyrsta folaldið

Sauðárkróks-Hestar — Wed, 19 May 2010 21:42:32 +0000

Fyrsta hryssan kastaði í vikunni, Otursdóttirin Viðja kom með rauða hryssu. Faðirinn er Roði frá Múla. Búið er að sýna þrjú hross undan Viðju, öll í fyrstu verðlaun og er meðaltal hæfileika 8,39. Það verður því spennandi að fylgjast með þeirri rauðu.

Annars er það að frétta af okkur að allt er stopp útaf pestinni og ekki útséð hvenær við getum byrjað aftur.