Systurnar Hrund og Hetta köstuðu fyrir nokkrum dögum síðan. Hetta kom með rauðstjörnótta hryssu undan Mola frá Skriðu. Fallegt folald sem gormast um á vígabrokki. Hrund kom með brúnskjótta hryssu undan Þristi frá Feti, litskrúðugt og spengilegt folald. Þá á aðeins ein hryssa eftir að kasta en það er Urður sem er fylfull við Óskasteini frá Íbishóli.
Skoða fleiri myndir með frétt »

Arabi er þriggja vetra stóðhestur í okkar eigu undan Eldingu og Glym. Við vorum á ferð í A-Húnavatnssýslu um daginn og heilsuðum uppá Araba sem er þar í hryssum. Hann leit vel út og eins og sjá má á myndunum sem við tókum er hann alltaf jafn háreistur og glæsilegur.
Skoða fleiri myndir með frétt »

Hvíta-Sunna kom okkur á óvart og kastaði fyrr en við áttum von á. Hún kom með brúnstjörnótta hryssu en faðirinn er Krákur frá Blesastöðum. Fínlegt og frítt folald sem fer um á fallegu tölti. Þær mæðgur eru farnar norður í Eyjafjörð þar sem Hvíta-Sunna mun fara undir gæðinginn Kvist frá Skagaströnd.
Skoða fleiri myndir með frétt »

Í vikunni klipptum við hófa á öllum tryppunum og gáfum ormalyf. Eftir það voru þau rekin í sumarhaga á Miklahóli. Meðfylgjandi eru myndir af skjóttum unghryssum með sumarhagana í baksýn. Ennig eru myndir af brúnstjörnóttri þriggja vetra undan Slettu og Samber og jarpri tveggja vetra undan Hvíta-Sunnu og Aðli.
Skoða fleiri myndir með frétt »

Við eigum tvo þriggja vetra fola sem eiga að verða miklir vekringar í framtíðinni! Þeir eru báðir undan Kjarval en mæðurnar eru Ólga og Þoka . Það eru mikil skeiðgen í þessum bræðrum og vonandi standa þeir undir væntingum. Allt uppeldi hefur miðast við það að gera þá nógu öfluga og Ólgu sonurinn gengur enn undir móður sinni. Hvort þetta heppnast mun tíminn leiða í ljós en það er gaman að láta sig dreyma.